Akiliutissat akiligassanngortut taarsigassarsiallu amiakkuisa isumakkeerneqarnissaannik qinnuteqaatinik aqutsineq pillugu Namminersornerullutik Oqartussat nalunaarutaat nr. 10, 18. april 2002-meersoq.
Inissialiornermut tapiissuteqartarneq pillugu Inatsisartut peqqussutaanni nr. 1, 9. april 1992-imeersumi Inatsisartullu peqqussutaatigut nr. 19, 12. november 2001-imeersukkut allanngortinneqartumi § 21a tunngavigalugu makku aalajangersarneqarput:
§ 1. Akiliutissat akiligassanngortut kiisalu inissialiornermut tapersiissuteqartarneq pillugu Inatsisartut peqqussutaanni kapitali 4 tunngavigalugu taarsigassarsianut akiitsut amiakkuisa isumakkeerfigineqarnissaannik qinnuteqaatit A/S Inissiaatileqatigiiffik INI-mut tunniunneqartassapput, taassumalu imm. 3-mi piumasaqaatit taaneqartut qinnuteqaatini eqqortinneqarnersimanersut Naalakkersuisut sinnerlugit nakkutigissavaa.
Imm. 2. Taarsigassarsisimasut inoqutaallu ukiuni kingullerni marlunni inaarlugit akileraarusersuinermi ukiumut 128.000 kr.-it inorlugit akileraaruteqaataasussanik isertitaqartartut akiliutissat akiligassanngortut taarsigassarsiallu amiakkuisa isumakkeerneqarnissaannik qinnuteqarsinnaapput. Meeqqat 18-it inorlugit ukiullit angerlarsimaffimmi najugaqartut inuillu aqqisa nalunaarsorsimaffiannut nalunaarutigineqarsimasut tamaasa immikkut eqqarsaatigalugit, taamaattorli amerlanerpaamik meeqqat arfinillit naatsorsuutigalugit, isertitat killissaat 4.000 kr.-inik qaffanneqartassaaq.
Imm. 3. Makku qinnuteqaammut ilanngullugit nassiunneqartassapput:
1) Qinnuteqaateqartup inoqutaasa aqqi, inuttut normui suliffiilu pillugit paasissutissat.
2) Taarsigassarsiat suut isumakkeerneqarnissaat kissaatigineqartut pillugit paasissutissat.
3) Inoqutigiit tamarmik pigisaasa nalingat pillugit paasissutissat.
4) Kommunimit, aningaaserivimmit il.il. paasissutissanik pisariaqartunik qinnuteqaatip suliarineqarnerani atugassanik pissarsiniarnissamut inoqutigiit tamarmik akuersillutik uppernarsaanerat.
Imm. 4. A/S Inissiaatileqatigiiffik INI qinnuteqarnermi immersugassamik imaluunniit nalunaaruteqarnermi atugassamik assigiissaartunik oqaasertalersukkamik sanasinnaavoq.§ 2. Qinnuteqaat paasissutissanik amigaateqarpat A/S Inissiaatileqatigiiffik INI-p tunngavissaqanngitsumik utaqqisitsinani sapaatit akunnerinik sisamanik piffissaliilluni paasissutissat amigaataasut nassiunneqaqqullugit qinnuteqartumut nalunaarutigissavaa.
§ 3. Qinnuteqaatip misissorneqarnerani A/S Inissiaatileqatigiiffik INI-p pissutsit § 1, imm. 3, nr. 1-3-mi taaneqartut malinneqarsimanersut misissussavaa, matumani inoqutigiit tamarmik akileraaruteqaataasussanik isertitaat pillugit paasissutissat pissarsiarineqarnisaat ilanngullugit.
Imm. 2. Qinnuteqartoq akiligassaqarpat akilerneqareersimasussaraluanik kinguartoorutinik A/S Inissiaatileqatigiiffik INI-p ukiuni ataasiakkaani akiitsut taakkulu allanngorarneri kiisalu qinnuteqartup inoqutaasa ukiuni taakkunani isertitaat sapinngisamik nassuiassavai.§ 4. Aammattaaq pissutsit makku A/S Inissiaatileqatigiiffik INI-p Naalakkersuisunuit nalaunaarutigissavai:
1) Illup pisoqaassusia.
2) Illup qanoq annertutigisumik atortorissaarusersugaanera.
3) Illup ataatsimut isigalugu qanoq issusia, assersuutigalugu assilisatigut immersugassatigullu allaaserinninnikkut.
4) Akiitsut sinnerisa amerlassusiat.
5) Piffissami aalajangersimasukkaartumi akiliutaasartut amerlassusiat.
6) Taarsigassarsiallip manna tikillugu akilersuinera, akiligassanik akilerneqareersimasussanik kinguaatooruteqarpat taakku ukiunut ataasiakkaanut agguarlugit immikkoortiterlugit.
7) Akiliutissanik akilerneqareersimasussanik kinguaatoorutinik manna tikillugu akiliisitsiniartarsimaneq.
8) Najukkami pineqartumi pisortatut oqartussaasut inissianik attartortittakkanik pilersuinerat.
9) Illup tuniniarneqarsinnaanera eqqarsaatigalugu Inissiaatileqatigiiffiup misilittagai.
10) Illup kommunimut tunniunneqarsinnaaneranut periarfissaqarnersoq.
11) Najukkami pineqartumi BS-ip illuutaanik illutaarniarlutik qinnuteqartut qassiussusiat.§ 5. Qinnuteqaatit paasissutissanik pisariaqartunik tamanik ilaqartinneqartut, tak. §§-it 3 aamma 4, Naalakkersuisunut aalajangiiffigisassanngorlugit nassiunneqartassapput.
Imm. 2. Akiliutisat akiligassanngortut kiisalu taarsigassarsiat amiakkuisa isumakkeerneqarnissaannik Naalakkersuisut aalajangiinerannik nalunaarut qinnuteqartumut toqqaannartumik nassiunneqartassaaq, A/S Inissiaatileqatigiiffik INI nalunaarutigisap taassuma assilineranik nassillugu, taaneqartullu kingulliup taarsigassarsiat isumakkeerneqarnerisa uppernarsarneqarnissaat Nunattalu Eqqartuussiviata nalunaarsuiffianit peerneqarnissaat pillugu iliuusissat pisariaqartut isumagissavai.§ 6. Akiliutissanik akiligasanngortunik taarsigassarsiallu amiakkuinik isumakkeerinninnissamik aalajangiinermi tak. § 5, imm. 2, qinnuteqartup utoqqaassusia, inuussutissarsiorsinnaajumaarnera, nalilinnik pigisaqarneranut tunngasut taarsigassaarsiallu erniaannik taarsigassarsianillu akilersuutinik akilersuisinnaassuseqarnera pillugu ilimagisat isiginiarneqartassapput.
Imm. 2. Pissutsit imm. 1-imi taaneqartut saniatigut pissutsit makku aamma isiginiarneqartassapput:
1) Illup pisoqaassusia.
2) Illup qanoq annertutigisumik atortorissaarusersugaanera.
3) Illup ataatsimut isigalugu qanoq issusia, assersuutigalugu assilisatigut immersugassatigullu allaaserinninnikkut.
4) Akiitsut sinnerisa amerlassusiat.
5) Piffissami aalajangersimasukkaartumi akiliutaasartut amerlassusiat.
6) Najukkami pineqartumi inissianik pilersuineq.
7) Illup tuniniarneqarsinnaaneranut periarfissat.
Imm. 3. Qinnuteqartoq qinnuteqartulluunniit inoqutaani qinnuteqartoq alla inatsit alla malillugu piffissami aalajanersimasukkaartumi akiliutissanik tamakkiisumik ilaannakortumilluunniit akiliunneqarsinnaappat tamanna naliliiniarnermi ilanngullugu isiginiarneqassaaq.§ 7. Nalunaarut manna 1. maj 2002 aallarnerfigalugu atortuulersinneqarpoq.
Namminersornerullutik Oqartussat, ulloq 18. april 2002
Jørgen Wæver Johansen/
Jens K. Lyberth